اللہ نے کہا : نکل جا یہاں سے ، ذلیل اور مردار ہوکر ، ان میں سے جو تیرے پیچھے چلے گا ، ( وہ بھی تیرا ساتھی ہوگا ) اور میں تم سب سے جہنم کو بھر دوں گا ۔

فرمایا یہاں سے نکل جا رد کیا گیا راندہ ہوا ، ضرور جو ان میں سے تیرے کہے پر چلا میں تم سب سے جہنم بھردوں گا ( ف۲٤ )

فرمایا ، نِکل جا یہاں سے ذلیل اور ٹھکرایا ہوا ۔ یقین رکھ کہ ان میں سے جو تیری پیروی کریں گے ، تجھ سمیت ان سب سے جہنم کو بھر دوں گا ۔

ارشاد باری ہوا: ( اے ابلیس! ) تو یہاں سے ذلیل و مردود ہو کر نکل جا ، ان میں سے جو کوئی تیری پیروی کرے گا تو میں ضرور تم سب سے دوزخ بھر دوں گا

اللہ تعالیٰ کے نافرمان جہنم کا دیندھن ہیں اس پر اللہ کی لعنت نازل ہوئی ہے ، رحمت سے دور کر دیا جاتا ہے ۔ فرشتوں کی جماعت سے الگ کر دیا جاتا ہے ۔ عیب دار کر کے اتار دیا جاتا ہے ، لفظ مذوم ماخوذ ہے ذام اور ذیم سے ، یہ لفظ بہ نسبت لفظ ذم کے زیادہ مبالغے والا ہے ، پس اس کے معنی عیب دار کے ہوئے اور مدحور کے معنی دور کئے ہوئے کے ہیں مقصد دونوں سے ایک ہی ہے ۔ پس یہ ذلیل ہو کر اللہ کے غضب میں مبتلا ہو کر نیچے اتار دیا گیا ۔ اللہ کی لعنت اس پر نازل ہوئی اور نکال دیا گیا اور فرمایا گیا کہ تو اور تیرے ماننے والے سب کے سب جہنم کا ایندھن ہیں جیسے اور آیت میں ہے ( فان جھنم جزأکم ) الخ ، تمہاری سب کی سزا جہنم ہے تو جس طرح چاہ انہیں بہکا لیکن اس سے مایوس ہو جا کہ میرے خاص بندے تیرے وسوسوں میں آ جائیں ان کا وکیل میں آپ ہوں ۔